Monday, 22 January 2018



ভোগালী আপদীয়া অপদ্য


নাই অ’

শুনা নাই আইতাৰ ঢেকী শালত

ঢেংকুলুচ মাত ৷
নচা নাই বঢ়নি মাৰিয়ে
চিৰাৰ খোলাত দীঘল হাতৰ চোলা পিন্ধি বহা নাই পেহী।
ঢেকীৰ নেজত বহি খেলা নাই মইনাই
কলি ঔচ বগী ঔচ ধুপুচ।
নাই সলোৱা কোমল চাউলৰ বাবে ঢেকীৰ থোৰা
লগোৱা নাই সান্দহৰ বাবে গোল থোৰাত, ককাই।
খুৱলি আৰু ওখন মাৰিৰ নাই কাজিয়া
নিতাল পিঠাৰ খোলা
গোহালীত গৰু নাই
বাঁহৰ চুঙাৰ দৈ অথবা চুঙা পিঠা
ঘিলা পিঠা, তিল পিঠা, ফেনী পিঠা
খোলাচপৰীয়া, মাহ-কড়াই নাই
কাঠ আলু, মোৱা আলু, জপৰা আলু ক’ত পায়?


খালি মোনা হাতত লৈ দেউতা বজাৰ’লে যায়

শ্বপিং মলত হেনো ‘পেকেজিং’ বিহু পায়।

ঠালত সজাই বাইদেৱে "চেল্ফি" তুলি যায়

লাইক কমেন্টৰ উজানেই উঠি যায়।


দাদাহঁতে ঘৰ সাজে পথাৰত

তমালৰ গাঁঠি কি চিনিকে নাপায়।

হাজিৰালে মানুহ মাতি সাজে ভেলা ঘৰ

চেনেলৰ কেমেৰাৰ আগত কি যে খৰ-ধৰ।


আজিকালি ভোগ থাকে চহৰৰ দোকানত

আজিকালি ৰং থাকে ৰঙা পানীৰ বটলত

‘ডি জে’ৰ চাউণ্ড

বে সুৰা গান

মুৰ্গিৰ ঠেং, ৰাতিপুৱাৰ ‘হেং’

লিভাৰৰ দৰৱ কিনে ফাৰ্মাচি দোকানত।


বাগী কুঠাৰ নাই

গাঁৱত ডেকা নাই

আছে গৈ কেৰেলাত

ঠেতেলা বেঙেনা খাই

মাক হঁতে খুলি ৰাখি হেপাহৰ নঙলা

বাট চাই আহিব পুতাই

পিছে ভোগ নাই

আছে ভোগি

আকাল আৰু হাঁহাকাৰ ৷

টি ভিৰ পৰ্দাত

বৰ বৰ মাছৰ উজান

জুহালত নাই দৰিকণা

ঈশ্বৰো যে দিন কণা

নেদেখে কেতিয়াও

দুখীয়াৰ কপাল।

-বিনয় 12 জানুৱাৰী 2018

No comments:

Post a Comment

মোৰ ঠিকনা বিচাৰিছে তেওঁ। হেল্ল, শুনা, তোমাৰ ঠিকনাটো দিয়া। অলপ মৰম পঠাম। কুৰিয়াৰ চাৰ্ভিছত। -হুমম.. কোন? কোন বাৰু তুমি?! -অহঃ পাহৰিল...