Wednesday, 21 March 2018

আমে মলিয়ালে তৰা

তৰা,
আমে মলিয়াইছে আকউ
কঠালৰ ডালত নিশা নিশা কেতেকীৰ মাত
কুমলীয়া পাত তগৰৰ গাত
কপৌ জুপিয়েও মেলিছে চুপহি
তই বাৰু লগাইছ নে মোলৈ
পকোৱা সূতাৰ গামোচাৰ তাঁত?
পৰিছে নে মনত তাঁত বাটি কাঢ়োতে
দেখিছনে মোৰ মুখ ৰাঁচ ভৰাওঁতে
ৰৈ গৈছে নে ভৰি তাঁত চলাওঁতে
লগাইছনে শালিকী যুটিয়া ব' তোলোঁতে
শালত তুলিবি কেতিয়া
বুকুৰ শালত
আৰু প্ৰেমৰ গান এটা গাই
ফুল বাচিবি সপোনৰ?
গবি কেতিয়া-
"বহোঁ তাঁতৰ পাতত
চকু আলিবাটত"
সৰি পৰিবনে মাকোঁ মোৰ কথা ভাবি
পিচলিব নে গৰকাত ভৰি?
চিগিবনে বাৰে বাৰে সূতা
ভাগিবনে ৰাঁচৰ কাঠি?
লুটিয়াই দিবলৈ লোৱা ফুল পাহৰ
এফাল মই এফাল তই
আমি যেন ইপিঠি সিপিঠি ৷

তৰা অ' আম ফুলিছে আকউ
তোৰ গামোছাৰ ফুলত
জিলিকি উঠিছে ফুলাম জাপি
আহ বৰষুণত তিতোঁ
প্ৰেমৰ বৰষুণত
উজাগৰে থাকোঁ এনিশা
কেতেকী বিনোৱা ৰাতি ৷৷

  -বিকৃতাফু ২১ মাৰ্চ ১৮

No comments:

Post a Comment

।। এই বাটেৰে আজি তেওঁ আহিব ।। এই বাটেৰে আজি তেওঁ আহিব এই ফুলনীত আজি ফুল ফুল ফুলিব নুফুলা বহু কলিও সৰি পৰিব পছোৱা বলিব মিছা ভালপোৱাৰ ...